یازان: او. هنری
چئویرن: سئودا میرزازاده اصل
چاپ: آناوارلیق درگی سی - 10-جو سایی
بیر دلار و نیئددی سئنت. هامیسی بو قدریدی و آلتمیش سئنتی، بیر پئنیلیکلردن اولوشوردو. پئنیلر، باققال، گؤیچو و قصابی تهدید ائلمکدن و یا بیلهلرینه چیلیسلیک صیفتی نیسبت وئردیکلرینده، اونلارلا قیزارا بوزارا چنه وورماقدان اله گلمیشدی. دئللا، پوللاری، اوچ دفعه سایدی. بیر دلار ن یئددی سئنت. صاباحسا کریسمس بایرامییدی.
اؤزونو، اسکیلیب بوزارمیش کاناپهنین اوستونه آتیب آغلاماقدان باشقا گؤرهجک بیر ایشی قالمامیشدی. دئللا دا او ایشی گؤردو و توم بونلارسا، یاشامین، هؤنکور-هؤنکور آغلاماق، گؤز یاشی تؤکمهک و گولومسهمکدن عیبارت اولدوغونو و البته، گؤز یاشینین داها چوخ حاکیم اولماسی اخلاق درسینی وئریر.
گلین، ائوین خانیمی یاواش-یاواش آراملاشانا قدهر، بیزده، ائوه بیر گؤز دولاندیراق. هفتهسی، سککیز دلارا توتولموش اشیالی بیر واحد. بو ائوی، یولچوخانا دئمکله تعریفلهیه بیلمریک؛ آمما، گؤرونوشو، یولچولار دئپارتمانینا بنزهییردی.
آشاغاکی دالاندا، ایچینه بیر مکتوب بیله آتیلمامیش بیر مکتوب صاندیغی وارییدی و هئچ بیر فانی اینسانین چالماغا اورک ائلمهیهجهیی بیر الکتریک دویمهسی (زنگ). هابئله، زنگین یانیندا، اوزرینده میستیر جیمز دیلینگهام یانگ» یازان بیر کارت واریدی.
دیلینگهام» باشلیغی، اسکیدن وارلیقلی اولدوقلاری و ائو صاحیبینین آیدا اوتوز دلار آلدیغی گونلرده زنگین یانینا آسیلمیشدی. گلیرلرینین ییرمی دلارا یئندییی بو گونلرده، دیلینگهام آدی، تار نظره گلیردی. سانکی کلمهلر، داها ساده، متواضع و کیچیک بیر د» حرفینه دؤنوشمک اوزره تارلاشیردیلار. آمما، میستیر دیلینگهام ائوه گلیب اوتوردوقلاری قاتا واردیغیندا، آدی، جیم» دئیه سسلنهردی و بیراز اؤنجه دئللا اولاراق تانیتدیغیمیز میسیز جیمیز دالینگهام اونو اورکدن قوجاغینا چکردی. البته، بوراسی اولدوقجا گؤزلدیر.
دئللا، آغلاماسینا سون وئریب فیکرینی یاناقلارینا و اونلاری پودور بئزیایله بزمهیه وئردی. پنجرهنین کناریندا دوروب دونوق بیر شکیلده کدردولو آرخا باخجاداکی بوز رنگلی حاصارین یانیندان دومان رنگینده اولان بیر پیشییین کئچمهسینه باخیردی. صاباح کریسمس بایرامییدی و جیمه هدیه آلماق اوچون سادجه بیر دلار ن یئددی سئنتی وارییدی. آیلارجا بیر پئنیلری ییغیب ساخلادی؛ آمما، سادجه بو قدهر ییغا بیلمیشدی. آیدا ییرمی دلار کیمی گؤرر کی؟ خرجلری حسابلادیغینین اوستونده ایدی. جیمه هدیه آلا بیلمک اوچون سادجه بیر دلار ن یئددی سئنی وارییدی. اونون سئوگیلی جیمی. ساعالارجا سئوینجله دولوب جیمه یاخشی بیر هدیه آلا بیلمهک اوچون پیلانلار تؤکموشدو. اینجه، نادیر وتمام عیار بیر هدیه اولمالییدی. جیمین حیات یولداشی اولمانین وئردییی شرفه بیرازدا اولسا یاراشاجاق بیر هدیه اولمالییدی.
اتاقین پنجرهلرینین آراسیندا، اوزون بیر بوی آیناسی وارییدی. بلکه سیز ده، هفتهلیک کرایهسی سککیز دلار اولان ائولرده بو مدل آینالاردان گؤروبسونوز. اینجه و قیوراق بیریسی، سریع کئچهرک، دار آیناداکی یانسیماسیندان، گؤرونتوسو حاقدا دوزگون بیر آنلاییشا یئتیشردی. دئللا، اینجه بیریسی اولاراق، بو ایشی چوخ یاخشی باجاریردی.
بیردن-بیره، پنجرهنین اؤنوندن چکیلیب آینانین قارشیسیندا دوردو. گؤزلری اییشیلدیردی؛ آمما، ییرمی ثانیه ایچینده رنگی سولدو. تئز ساچلارینی آچیب چیینلرینه تؤکدو.
جیمیز دیلینگهام یانگ عاییلهسینین اونلارا فخر ائلدیکلری ایکی دیرلی شئیی واریدی. بیری، جیمین باباسی و بؤیوک باباسیندان قالان قیزیل ساعاتییدی. بیریسیسه، دئللانین ساچلارییدی.
آیدینلیغین او یانیندا صبا ملکهسی بیله یاشاسایدی، ملکهنین باشاریلاری و جواهیرلرینین ایشیلتیسینی سؤندوروب دهیرینی دوشورمک اوچون، دئللانین ساچلارینی قورولاماسی اوچون پنجرهدن ائشیه ساللاماسی یئترلی اولاردی. حضرت سلیمان، قاپیچی اولوب بوتون خزینهسیله آپارتمانا گلسهیدی، جیم، اونون حسرتدن ساققالینی یولدوغونو گؤره بیلمک اوچون، هر سئری یانیندان کئچرکن، ساعاتینی ائشیه چیخارداردی.
بئلهجه او آن، دئللانین گؤزل ساچلاری، بیر قهوه رنگلی شلاله کیمی لپهلهنیب پارلایاراق چییینلرینه تؤکولدو. ساچلارینین اوزونلوغو، دیزلرینین آشاغیسینا قدرییدی و اونو بیر اؤرتو کیمی سارمیشدی. سونرا، بیردن-بیره، نیگرانلیقلا، ساچلارینی یئنیدن توپلادی. بیر آنلیغینا دوروخوب قالدی. بیر نئچه داملا یاش،گؤزلریندن اسکی بوزارمیش خالییا تؤکولدو.
اسکی قهوه رنگلی ژاکتینی گئییب اسکیمیش قهوهرنگلی بؤرو باشینا قویوب چیخدی. اتهیینده دؤنهرک اولوشان بیر فیریلتی و گؤزلریندهکی ایشیلتیایلا، قاپیدان چیخدی. پیللهلری ائنیب خیابانا گئتدی.
سونوندا، اوزرینده، مادام سوفونییه. هر جینسدن ساچ اورونلری» یازان تابلونون اؤنونده دوروب اوخودو. پیللهلری، نه یاپدیغینی بیلمهدن، ایکی بیر چیخدی. نفس-نفس ووروردو. اؤزونو توپارلادی. مادام سوفونییه آدینا هئچ یاراشمایان، یئکه، آغ-آپباق و سویوق بیر قادیندی.
منیم ساچلاریمی آلارسینیزمی؟» سوروشدو دئللا.
من ساچ آلارام.» دئدی مادام. بؤروزو چیخاردین ساچلاریزا بیر گؤز آتاق.»
قهوه رنگلی شلاله، آشاغایا ساری لپهلندی. مادام ساچلاری آلیشقین بیر بیچیمده توپلایاراق ییرمی دلار» دئدی.
پولو تئز وئرین.» دئدی دئللا. آه و او کئچن ایکی ساعاتدا، سانکی بولودلارین اوزریندهایدی. بو قارماقاریشیق تشبیهی بیر یانا بوراخاق. ماغازالاری، جیمه بیر هدیه آلا بیلمک اوچون آلت-اوست ائلهییردی.
تاپدی سونوندا. سانکی اونو، سادجه جیم اوچون دوزلتمیشدیلر. اوبیری ماغازالارین هئچبیرینده، بونا اوخشار بیرزاد یوخویدو. بوتون ماغازالاری آختارمیشدی.ساده و گؤستریشسیز، پلاتین بیر ساعات زنجیرییدی. اونون دهیری، شاققیرتیلی بزکلردن دئییلدی، هر یاخشی بیر شئی کیمی، اونون دا دهیری، اؤزوندن و ماددهسیندن ایدی. ساعاتین اؤزوندن بیله داها دهیرلیییدی. اونو گؤردویو آندا، بو جیمین اولمالیدیر دئمیشدی. زنجیر اونون اؤزو کیمییدی. گؤستریشسیز و دهیرلی. بو تعریف ایکیسی اوچون ده کئچرلییدی. اونون اوچون دئللادان، ییرمیبیر دلار آلدیلار. یئتمیشسککیز سئنتله ائوه قاییتدی. جیم ساعاتینداکی بو زنجیرله، آرتیق، ایستهدییی یئرده اوتانمادان راحاتلیقلا ساعاتینا باخا بیلر. ساعاتی اولدوقجا گؤزلدی، آمما بعضا، زنجیر یئرینه ساعاتینا تاخدیغی او اسکی دریدن اوتاندیغی اوچون، ساعاتینا باخارکن کیمسهلره گؤستریه چالیشیردی.
ائوه یئتیشدیینده، سانکی سرخوشلوق، یئرینی بیراز، احتیاط و دوشونجهیه وئردی. بابلئسینی چیخارتدی، گازی یاندیریب سئوگیسی اوچون یاپدیغی باغیشین یول آچدیغی ییخیمی تعمیر ائلمهیه باشلادی. بو چوخ معظم بیر ایشدیر سئوگیلی دوستلار. قوجامان و چتین بیر ایش.
قیرخ دقیقهده، باشی، بالاجاو بیربیرینه یاخین بوروق ساچلارلا دولموشدو. مدرسهدن قاچاق بیر اوغلان اوشاغینا بنزهییردی. آیناداکی یانسیماسینا دیققتله تنقیدجی باخیشلارلا باخدی.
جیم، ایلک باخیشدا منی اؤلدورمسه، ایکینجی دفعه دؤنوب باخمادان اؤنجه، ئی آیلیند کورو قیزلارینا بنزهدییمی سؤیلیهجکدیر. آمما، نه یاپا بیلردیم؟ بیر دلار ن یئددی سئنله نه یاپا یلردیم؟»
ساعت یئددیده، قهوه حاضیرییدی و قیزغین تاوا، گازین دالی شعلهسینده کتلتلری بیشیرمک اوچون گؤزلهییردی.
جیم، هئچ بئواختا قالمازدی. دئللا، زنجیری الینده جوت قاتلاییب اونون گلجهیی قاپینین یاخینینداکی میزین گوشهسینده اوتوردو. جیمین آیاق سسلرینی بیرینجی قاتدان ائشیتدی. بیر آن رنگی آتدی. دئللانین، گئندهلیک ساده شئیلر اوچون سسسیز ایچیندن دوعا ائلمک کیمی بیر عادتی وارییدی. ایندی ده پیچیلداییردی: تانریم! نه اولار گئنه ده گؤزل اولدوغومو دوشونسون.»
قاپی آچیلدی. جیم ایچری گیریب قاپینی اؤرتدو. آریق و اولدوقجا جیددی نظره گلیردی. یازیق اوغلان، سادجه ییرمی ایکی یاشی وارییدی. عاییله یوون آلتیندا ازیلمیشدی. تازا بیر کتا احتیاجی وارییدی، الجهیی ده یوخویدو.
جیم قاپیدان ایچری گیردیی آن، یئرینده، بیلدیرجین قوخوسو آلمیش آو تولاسی کیمی قورودو. گؤزلرینی دئللانین اوزونه زیللهمیشدی. باخیشلاریندا، دئللانین اوخویا بیلمهدییی بیر ایفاده وارییدی. و دا اونو چوخ قورخودوردو. اوزوندهکی ایفاده نه حییرصییدی، نه شاشقینلیق،نه قیناما، نه دهشت، نه ده اؤزونو حاضیرلامیش اولدوغو بیر دویغویدو. جیم، اوزوندهکی او ایفادهایله سادجه اونا باخمیشدی.
دئللا، یئریندن قالخیب، یانینا گئتدی.
جیم، سئوگیلیم.» دئیه آغلادی. نه اولار منه اوجور باخما. ساچلاریمی کسدیریب ساتدیم. آخی کریسمسی سنه هدیه وئرمهدن کئچیرهمزدیم. یئنه ده اوزاناجاق دیر. مندن اینجیمهدین دئییل می؟ مجبورودوم. منیم ساچلاریم تئز اوزانار. کریسمسی قوتلا جیم! گل سئوینجلی اولاق. بیلسن سنه نه گؤزل نه یاخشی بیر هدیه آلمیشام.»
سن ساچلاریوی کسدیریبسن؟» جیم چتینلیکله سوروشدو. بئینینی نهقدهر ده زورلاسا، سانکی گرچهیی قاورایا یلمهییردی.
کسیب ساتدیم.» دئدی دئللا. آرتیق منی اسکیسی کیمی سئومیهجکسنمی؟ من، ساچلاریم اولدان دا یئنه اؤزومم. دئییلممی؟»
ساچلارینین گئتدییینیمی دئییرسن؟» دئیه گیجلمیش بیر حالدا سوروشدو.
آختارماغیوا گرک یوخ.» دئدی دئللا. ساتیلدی. دئدیم سنه. ساتیلدی و گئتدی. کریسمسی قوتلاییریق جانیم. منیمله یاخشی اول. سنین اوچون بو ایشی گؤردوم. بلکه ساچلاریمی سایا بیلردین،» بیردن جیددی بیر شیرینلیکله داوام ائتدی: آمما سنه اولان سئوگیمی کیمسه سایا بیلمز. آرتیق کتلتلری تاوایا قویالیممی جیم؟»
بو هیبنوتیزمه بنزر حالیندان بیردن اویاندی. دئللاسینی قوجاقلادی. گلین اون ثانیه باشیمیزی چئویریب احتیاط و دیققتله باشقا منطقسیز بیر قونونو دارتیشاق. هفتهده سککیز دلار و یا ایلده بیر میلیون دلارین نه فرقی وار؟ بیر ریاضیاتچی و یا فیلسوف، سیزه یانلیش جواب وئرهجکدیر. بیلیجی شاهلارین گتیردیکلری آرماغانلارین آراسیندا بو سورغونون جوابی یوخدور. بو قونو، داها سونرا آیدینلانماق اوزره، قارانلیقدا بوراخیلیر.
جیم، کتونون جیبیندن بیر پاکات چیخاردیب میزین اوستونه آتیر.
یانلیش آنلاما دئل.» دئدی جیم. منیم حاققیمدا پیس فی ائلمه. منجه، ساچ قیسالتماق، ساققالی وورماق و یا شامپو دییشدیرمک، منیم جانیم حیات یولداشیمی داها آز سئومهییمه سبب اولا بیلمز. آمما، بو پاکاتی آچسان، بیراز اؤنجه نیه بیردن-بیره تومدوغومو آنلایا بیلرسن.»
او بیاض قیوراق بارماقلار، ایپی چؤزوب کاغاذی آچماغا باشلادی. و سونرا، سئوینجدن سرخوش بیر چیغیرماق سسی گلدی. آمما یا اوندان سونرا، تانریم! یئیین قادینسی بیر دییشیم، هیسیریک گؤز یاشلاری و ناله فیغان. ائلهکی، ائوین ائفندیسی، بوتون گوجویله، اونو دیندیریب راحالاتماغا باشلادی.
چونکو پاکاتدان داراقلار چیخمیشدی. دئللانین برودوئیده گؤروب اوزون زامان اونلاری دیلیندن دوشورمهدییی داراقلار. بیر سئت داراق، ایکیسی ساچلارا یانلاردان و بیریسی ده آرخادان تاخیلیردی. گؤزل داراقلارییدیلار. توسباغا لاکیندان دوزلتیلمیشدیلر و کنارلاری، دهیرلی داشلارلا سوسلنمیشدی. باهالی داراق اولدوقلارینی بیلیردی. اوزوده تام ساچلارینین رنگ تونوندایدی. چوخ آرزولامیشدی، اورهیینده بیر ذرهده اونلارا صاحیب اولماق اومودو اولمادان سادجه حسرت چکمیشدی. آرتیق اونونویدولار، آمما سوسلهیهجکلری ساچلار آرتیق یوخویدولار.
آمما، اونلاری قوجاغینا سیخدی.سونوندا سؤنوک گؤزلرله جیمین اوزونه باخیب دئدی: منیم ساچلاریم چوخ تئز اوزانار جیم!»
بیردن-بیره، دئللا، قارساقلانمیش پیشیک کیمی یئریندن دوروب آه! آه!» دئیه قیشقیردی.
جیم هله اؤز هدیهسینی گؤرممیشدی. آچیق ووجونداکی هدیهنی، جیمه ساری اشتیاقلا توتدو. بوز دهیرلی مئتال، سانکی، دئللانین پارلاق جوشغولو دویغولارییلا پارلادی.
چوخ شیک دئییلمی جیم؟ بونو تاپماق اوچون بوتون شهری آلت-اوست ائلمیشم. آرتیق گونده یوز دفعه ساعاتا باخمالیسان. ساعاتیوی منه وئر. ایسهییرم زنجیری سالدیغیمدا نئجه اولدوغونو گؤرم.»
دئدییی ایشی گؤرمک یئرینه، اؤزونو کاناپهنین اوزرینه آتدی و اللرینی باشینین آلتینا قویوب گولومسهدی.
دئلل!» دئیه چاغیردی. گل کریسمس هدیه لریمیزی بیر کنارا قویوب بیراز دؤزک. او قدهر گؤزلدیلر کی، ایندی ایشلده بیلمهریک. ساعاتی ساتیب پولویلا سنه داراقلاری آلدیم. سانیرام آرتیق کتلتلری تاوایا سالا بیلریک.»
بیلدییز کیمی او اوچ کاهن، حضرت مریمه، عیسانی دونیایا گتیردییی زامان، دهیرلی هدیهلر آپاران بیلگه اینسانلارییدیلار. اونلار، کریسمس هدیهسی وئرمک هونرینی دب ائلهدیلر. بیلگه اولدوقلاریندان، هدیهلری ده، گرکدیینده قایتارا بیلمک ایمکانینا صاحیب اولدوغوندان، شوبههسیز، عاغیللیجایدی.
من ده بورادا توتارسیزجا، دوروب سیزه بیر آپارتماق قاتیندا یاشملارینی پایلاشان ایکی آخماق اوشاغین بیر-بیریندن اؤتورو سفئحلیک ائلهییب ان دهیرلی خزینهلرینی قوربان ائتمهلرینین معمولی حئکایهسینی یاریم-یامالق آنلاتیرام. آمما، گونوموزون بیلگهلرینه سون بیر سؤزده دئمهلییم کی بوتون هدیه وئرنلرین آراسیندا، بو ایکی اینسان ان بیلگهسی دیر. ان بیلگه اولانلار، اونلار کیمی هدیه آلیب وئرنلردیرلر. اونلار هر یئرده بیلگه دیرلر. اونلار او اوچ بیلگه کیمیدیرلر.
یازار : ادگار آلن پو
چئویرمن: سئودا میرزازاده اصل - علیرضا سربازی بناب
چاپ: ایمضا درگیسی - دؤردونجو سایی
ائحتیراسلی و خیال قوّه‌سی گوجلو اولان بیر عاییلهدن گلیرم. اینسان‌لار، منه دلی دئییرلر. آمما، دلیلییین ان یوکسک ذکا اولوب اولمادیغی، درین و محتشم شئیلرین چوخونون دوشونجه خستهلیییندن، عمومی دوشونجه‌لرین یئرینی آلان، ذهنسل روح حال‌لاریندان قایناقلانیب قایناقلانمادیغی سورغوسو، هله ده تام اولاراق جاوابلانمامیش‌دیر. گوندوزلری خیال قورانلار، گئجهلری خیال قوران‌لارین الدن وئردیکلری بیر چوخ شئیدن خبرلی‌دیرلار. بوز خیال‌لاریندا، سونسوزلوغو گؤررلر و اویاندیقلاری آندا بؤیوک بیر سیررا یاناشماغین هیجانینی یاشارلار. او قیسا زاماندا، بیلگه‌لییین یاخشیلیغیندان بیر شئی لر اؤیرهنرلر؛ آمما، پیسلییین صاف بیلگیسیندن اؤیرندیکلری شئیلر داها چوخدور. سؤزجوکلره سیغمایان ایشیغین» گئنیش اقیانوسونا سینیرسیزجا، کیمسه اونلارا باشچیلیق ائتمهدن گیررلر و یئنیدن، ماجراچی نوبالی جغرافیاچی کیمی، قارانلیق دنیزی کشف ائتمهیه گئدرلر.
بئله اولسا، گلین منه دلی دئیین. ان آزیندان، ذهنسل وارلیغیمدا، ایکی آنلاشیقلی دوروم اولدوغونو قبوللانیرام؛ بیری، یاشامیمین ایلک دؤوروندهکی مناقشهسیز آیدین منطیقیم و اوبیریسی ده، بو آندا اولدوغوم دوروم و البته یاشامیمین بؤیوک بؤلومونه شامیل اولان قارانلیق و شوبههچی حالیم. بئلهجه، یاشامیمین ایلک دؤنمیله ایلگیلی آنلادیق‌لاریما اینانین و سونراکیلارا، ساده‌جه عاغلینیزا باتسا اینانین، یا دا هامیسیندان شوبههلنین، یا دا شوبههلنه بیلسهنیز، بونلاری، ادیپوسون تاپماجالاری کیمی گؤرون.
جوانلیغیمدا سئودییم قیزلا ایلگیلی اولان آنیلاریمی، ایندی، آیدینلیقلا خاطیرلاییرام و آرامشله یازا بیلیرم. او، چوخ زامان اؤنجه اؤلموش اولان آنامین، تک باجیسینین تک قیزییدی. خالاقیزیمین آدی، ائلئنورایدی. آل-الوان اوتلار وادیسینده، ایستی بیر گونشین آلتیندا بیرلیکده یاشایاردیق. بیریسی یول گؤسترمهینه قدر، او وادییه کیمسه گلمزدی. نییهکی، اوجا و بؤیوک تپهلرین آراسیندا یئرلشمیشدی. گونش ایشیغی، تپهلرین، شیرین اوج-بوجاغیندان بیزیم وادییه یول تاپاردی. بیر یاندان دا، تپهلر، هر شئیین و هر کسین یولونو، بیزه ساری کسمیشدی. یاخینلیق‌لاریندان، یول کئچمزدی. سئویملی یووامیزا یئتیشه بیلمک اوچون، مینلرجه مئشه آغاجینین آراسیندان، چتینلیکله کئچیب و میلیون‌لارجا خوش قوخولو گؤزل چیچهیی ازهرک اؤلومه گؤندرمهمیز گرکردی. بو نه‌دندن من، خالاقیزیم و آناسی یالقیز یاشاییردیق و وادینین اؤتهسیندهکی دونیادان هئچ بیر شئی بیلمهییردیک.
وادیمیزی سینیرلایان داغ‌لارین آردیندان، یاشادیغیمیز یئرین یوخاریسینداکی قارانلیق بؤلگهلردن سوزولهرک ائشییه چیخان ائنسیز و درین بیر چای وارییدی. ائلئنورانین گؤزلریندن سونرا، بو چایدان پارلاق بیرزاد یوخویدو. لابیرنت کیمی مسیرینده قیوریلاراق، ایکی داغ آراسینداکی قارانلیق درهدن و گئریده بوراخدیق‌لاریندان داها قارانلیق اولان تپهلرین آراسیندان کئچردی. بونا سسسیزلیک چایی دئیردیک. سانکی آخیشیندا، چئورهسینی آراملاشدیران بیر تاثیر وارییدی. یاواش-یاواش، سس چیخارتمادان آخاردی. چایین یاتاغیندا اولان و اونلارا باخماقدان دویا بیلمهدیییمیز اینجی چای داش‌لاری هئچ ترپشمزدیلر. هر بیری، اولدوغو یئرده قالیب احتشاملا داواملی پاریلداردیلار.
چایین قیراغیندا، موختلیف یئرلردن بؤیوک چایین یاتاغینا یاواشجا سوروشوب گلن گؤز قاماشدیریجی چای‌لار و لاپ دیبدهکی چای داش‌لارینا قدر اوزانان قایناق سیزینتی‌لارینین کئچدییی یئرلرده عینی داغ‌لار آراسیندا اوزانان او وادینین هر یئری کیمی یوموشاق، یاشیل، قالین، قیسا، دوز و وانیل قوخولو اوتلارلا دولویدو. اوت‌لارین آراسینا، سانکی ساری قایماق چیچکلری، آغ پاپاتیالار، مور بنؤوشهلر و یاقوت قیرمیزیسی زنبقلر سپیلمیشدی. اونلارین گؤرونتوسو، اورهییمیزده، تانری سئویگیسی و احتشامی اویاندیراجاق قدر گؤزلییدی.
هر یئرده، چمنلییین یاخینلیغینداکی بالاجا مئشه‌ده، ال دیمهمیش خیاللار کیمی، افسانهوی آغاج‌لار گؤیهرردی. بو آغاج‌لارین، اینجه و اوزون گؤودهلری، دیک بیر شکیلده یوکسلمزدی و گوناورتا چاغلاری، وادینین اورتاسینا دوشن گون ایشیغینا دوغرو ظریفلیکله اییلردیلر. اونلار، یاشام دولو، آبنوس و یا گوموش رنگلی گؤرکملی خال‌لارلا پارلایاردیلار و ائلئنورانین یاناق‌لاریندان سونرا، هر شئیدن داها هامارییدیلار. بو آغاج‌لارین، باش‌لاریندا ساچیلمیش کیمی گؤرونن و سحر یئلینده تیترهیهن بؤیوک و پارلاق یاپراق‌لارینی گؤرن بیر کیمسه، اونلاری، گونش تانریسینا سایغی گؤسترن بؤیوک سوریه ایلانینا بنزده بیلردی.
اورهییمیزه سئوگی دوشمهدن اؤنجه، بو وادیده، ائلئنورایلا اون بئش ایل ال-اله گزدیک. او اون بئش و من ده ییرمی یاشیندایدیق. بیر آخشام، ایلانا بنزهین آغاج‌لارین آلتیندا اوتوروب بیر-بیریمیزین قوجاغینا گیردیک و سسسیزلیک نهرینده یانسینان گؤرونتولریمیزه باخدیق. او شیرین گونون قالانیندا، هئچ بیر سؤز دانیشمادیق. او گونون صاباحی، سؤزلریمیز آز و تیترک ایدی. تانری ائروسو، دالغالاردان چیخاردیب گتیرمیشدیک و ایندی ایچیمیزده، آتالاریمیزین آلوولو روحلارینی اویاندیردیغینی حیس ائدیردیک. نسلیمیز، عصیرلردیر ائحتیراس‌لاری و خیاللاری ایله باشقاسیندان آیریلیردی؛ ایندی ایسه، ایچیمیزده اویانان ائحتیراس‌لار، هر جور خیاللار گؤرمهییمیزه ندن اولوردو. بونلار بیر آرایا گلدیی زامان، الوان اوتلار وادیسینده، آلوولو بیر سئوینج حالی، بیر نفس کیمی یاییلدی. هر شئی دییشیلمهیه باشلامیشدی. اسکیدن چیچکسیز اولان آغاج‌لاردا، ایندی اولدوز شکیلینده اولان، عجیب و پارلاق چیچکلر آچیلیردی. یاشیل فرشین رنگ تون‌لاری پارلاقلاشمیشدی. آغ پاپاتیالار، دانا-دانا سولدوقلاریندا، یئرلرینده، اونلارجا، یاقوت قیرمیزیسی زنبق گؤیهریردی. یول‌لاریمیزدان، یاشام قوخوسو گلیردی. ایلک دفعه گؤردویوموز فلامینگولار، باشقا شن قوشلارلا بیرگه بیزه آل رنگلی للکلرینی گؤستریردیلر. چایدا، آلتین و گوموش رنگلی بالیقلار اوزوردولر. چایین درینلیکلریندن گلن بیر میریلتی، گئتدیکجه یوکسهلیردی و سونوندا، ائلوسون چنگیندن چیخان سسدن داها ایلاهی و داها آرامش وئرن بیر ملودییه دؤنوشوردو. بو مئلودی، ائلئنورانین سسیندن باشقا، هر شئیدن داها گؤزلییدی. هئسپئرین دیاریندان، اوزون بیر مدت ایزلهدیییمیز بولود، بوردان یاواشجا سوزولوب چیخدی. قیپ-قیرمیزی و آلتین ساریسی رنگ‌لرینده، مؤحتشم اولان بو بؤیوک بولود، باشیمیزین اوستونه گلدییی زامان دوروب یاواشجا، گوندن-گونه آلچالماغا باشلادی. سونوندا، کنارلاری، داغ‌لارین زیروهلرینه دییب، او دونموش زیروهلره بیر احتشام قاتاراق، سانکی بیزی سونسوزا قدر هیبتلی، گؤرکملی و سئحیرلی بیر زیندانا قاپاتدی. ائلئنورانین گؤزللییی، اسرافیل ملکلرینین گؤزللییی کیمییدی. چیچکلرین آراسیندا کئچیردییی قیسا عؤمرو بویونجا، ساده و معصوم بیر باه قیزییدی. اورهیینی جانلاندیران سئوگی اودونو گیزلتمک اوچون حیلهلره اوز گتیرمه‌ییردی. بیرلیکده، الوان اوتلار وادیسینده یئریدییمیزده، منی، قلبینین ان درین یئرلریندن اینجهلهییب و بو اورکده، سون زاماندا اوز وئرن بؤیوک دییشیکلیکلری آنلاتیردی.
سونوندا بیر گون، گؤز یاشلاری ایچینده، منه، بوتون اینسان‌لارین باشینا گلهجک ان سون و ان حزین دییشیمدن دانیشدی. او گوندن سونرا دا، بو قونونو دیلیندن هئچ دوشورمهدی و بوتون دانیشیق‌لاریمیزین قونوسو اولدو. هر سؤزونده، تکرار-تکرار، عینی تصویری، شیرازلی ساز شاعیری کیمی چئشیتلی آنلاتمالارلا دئییردی.
اؤلوم بارماغینین، سینهسینه توخوندوغونو گؤرموشدو. قیسا زاماندا اؤلمک اوچون، بیر کپنک کیمی، سئوگییله سونلانمیشدی. آمما، اونو تک بیر شئی، قبیره گیرمکدن قورخودوردو. بو قونونو، منه بیر آخشام، آلا قارانلیقدا سسسیزلیک چایینین قیراغیندا آنلاتدی. اونو، الوان اوتلار وادیسینه گؤمدوکدن سونرا، بو سئوگی دولو یئردن سونسوزا قدر آیریلاجاغیمدان، اونا قارشی دویدوغوم ائحتیراسلی عشقی، گوندهلیک و وادیدن اوزاق دونیاداکی قیزلاردان بیرینه وئرهجهییمدن قورخوردوم. اورادا، اؤزومو بیردن-بیره، ائلئنورانین آیاق‌لارینین آلتینا آتدیم. و باشیمی قالخیزیب، اونا کیمسهیه ائولیلیکله باغلانمایاجاغیما، اونون دهیرلی خاطیرهلرینه هئچ واخت آلچاقلیق ائتمه‌یه‌جهییمه و منه قارشی صداقتله بسلهدییی او منی تقدیس ائدن عشقه اهانت ائتمه‌یه‌جهییمه اونا و تانرییا آند ایچدیم و دونیانین مؤحتشم حوکومداریندان، صداقت آندیمین شاهیدی اولماسینی ایسته‌دیم و تانریدان و سنت هلوژندن، بو آندیمی پوزدوغوم زامان، منی قورخونج بیر شکیلده لعنتلمهلرینی ایسته‌دیم؛ ائله بیر لعنتلهمک کی اوندان دانیشماغا جرأت ائتمه‌ییرم. بو سؤزلریمی ائشیتدییی زامان، ائلئنورانین پارلاق گؤزلری داها دا پارلادی. سانکی، بوینوندان بؤیوک بیر یوک ائنمیشدی. تیترهدی و حزین گؤز یاش‌لارینی تؤکدو. آمما، آندیمی قبول ائلهدی (سونوجدا، ساده‌جه بیر اوشاغییدی). بو قونو، اونون اؤلوم دؤشهیینده، راحاتلاماسینا سبب اولدو. بیر نئچه گون سونرا، آرامشده اؤلمک اوزره اولدوغو زامان، ایچینی راحاتلاتدیغیم اوچون، اؤلدوکدن سونرا، روحونون منی گؤزله‌یهجهیینی و ایذن وئریلیرسه گئجهنین بئواخت زامان‌لاریندا گؤره بیله‌جهییم شکیلده قاباغیما چیخاجاغینی سؤیلهدی. آمما، بو جنتدهکی روحلارین گوجوندن اؤته بیر ایش اولسا، ان آزیندان، منه تئز-تئز وارلیغییلا ایلگیلی اشارتلر وئره‌جهییدی. نفسینی، آخشام یئللرییله، اوزومه ووراجاغیدی، نفس چکدیییم هاوادا، ملکلرین بوخوردانلاریندان چیخان توستولرین خوش قوخوسونو یایاجاغیدی. بو سؤزلر آغزیندان چیخاندا، معصوم یاشامی سونا چاتدی و بئلهلیکله، منیم یاشامیمین دا، ایلک دؤنمی سونا چاتمیش اولدو.
بورایا قدر، هر شئیی اولدوغو کیمی دئدیم. آمما، زامانین یولونداکی، سئوگیلیمین اؤلومویله اورتایا چیخان او مانعی آشدیغیمدا، یاشامیمین ایکینجی دؤنمینه گیرینجه، ذهنیمه بیر کؤلگه دوشدو. اودور کی، آنلاتدیق‌لاریمین دوغرولوغوندان شوبهه‌یه دوشورم. آمما، گئنه ده داوام ائدیرم. ایل‌لر، آغیر-آغیر کئچدی. الوان اوتلار وادیسینده یاشاماغا داوام ائتدیم. آمما، هر شئی، ایکینجی بیر دییشیم کئچیردی. او اولدوز شکلیندهکی چیچکلر سولدو و بیر داها آچمادی. او یاشیل فرشین رنگی آتدی. یاقوت قیرمیزیسی رنگینده اولان زنبقلر قورودو و اونلارین یئرینده، گؤزه بنزهین تیره رنگلی بنؤوشهلر چیخدی. دوپ-دولویدولار، هر یئرلرینی شبنم توتموشدو. حضورسوزلوقلا، قوورولوردولار. و یاشام، او دیاری ترک ائتدی. آرتیق اوزون بویلو فلامینگولار، بیزه ساری یئلکلرینی سرگیلهمهییردیلر. یان‌لاریندا گتیردیکلری باشقا شن پارلاق قوش‌لاری دا آلیب وادینی قملی ترک ائدیب، تپهلره اوچدولار. آلتین و گوموش رنگلی بالیقلار، وادینین آشاغاسینداکی درهدن کئچیب، دؤنمهمک اوزره، اوزاقلاشدیلار و او سئویملی چایی، بیر داها سوسلمهدیلر. ائلوسون یئل-چنگیندن چیخانلاردان داها خوش و آرامش وئرن و ائلئنورانین سسیندن سونرا بوتون سسلردن داها ایلاهی اولان او ملودی، گئدهرک آزالدی و چای، ان سونوندا، اؤنجهکی سسسیزلییینه تکرار بوروندو. ان سونوندا دا، او بؤیوک بولود یوکسلدی، او قات قات قیزیل پیریلتیسینی و بوتون احتشامینی یانینا آلیب الوان اوتلار وادیسیندن چکیلدییی زامان، داغ‌لاری اسکی دونوقلوقلارینا ترک ائدیب هاسپارین دییارینا گئری دؤندو.
آمما، ائلئنورا، وئردییی سؤزلری، اونوتمامیشدی. چونکو، ملکلرین ساللانان بوخوردانلیقلارینین سسلرینی ائشیدیردیم. قوتسال بیر توستونون قوخوسو، وادییه یاییلیردی. گئجهنین بئواخت ساعات‌لارینداکی یالقیزلیغیمدا، قلبیم آغیرلیقلا آتاندا، آنلیمی اوخشایان یئللره خفیف آه سسلری قاریشیردی. گئجه هاواسیندا، خفیف میریلتیلار ائشیدیردیم. و بیر دفعهسینده، آه ساده‌جه بیر دفعه، اؤلو کیمی یوخلادیغیمدا، بیردن دوداق‌لاریمدا، دوداق‌لارینی حیس ائدهرک اویاندیم. آمما، قلبیمدهکی بوشلوق، بونلارلا دولماغی رد ائدیردی. داها اؤنجه اونو دولدوروب داشیرتمیش عشقی اؤزلهییردیم. سونوندا، وادی منه ائلئنورانی آنیمساتدیغی اوچون، بیر عذابا دؤنوشدو و اورانی، سونسوزا قدر، دونیانین قرورو و ظفرلری اوغرونا ترک ائتدیم. اؤزومو، عجیبه بیر شهرده تاپدیم. بلکه بوراسی، الوان اوتلار وادیسینده اوزون مدت گؤردویوم شیرین خیاللاری اونوتدورا بیلردی. گؤرکملی بیر سارایین دبدبهسی و ایلنجهلری، سلاح‌لارین قودوزجا شاققیلتیلاری و قادینلارین گؤز آلیجی گؤزللیکلری باشیمی دؤندوردو و منی سرخوش ائتدی. آمما، روحوم، هله ده وئردییی سؤزلره صادیق قالدیغی اوچون، گئجهنین سسسیز ساعات‌لاریندا، هله ده ائلئنورانین وارلیغینین اشارهلرینی آلا بیلیردیم. بو بلیرتیلر، بیردن کسیلدیکلری زامان، دونیام قارالدی. ذهنیمه دولان یاندیریجی دوشونجهلرله منه راحات وئرمهین قورخونج آرزولار قارشیسیندا، دهشتله دونوب قالدیم. چونکو، خدمتینده اولدوغوم شاهین ایلنجهلی سارایینا اوزاق‌لاردان، چوخ اوزاقداکی بیلینمهین بیر دییاردان بیر جوان قیز گلمیشدی و آلچاق اورهییم، بو قیزین گؤزللییینی گؤرجک تسلیم اولدو. اونا افتخارسیزجا بویون ایدیم. اونو عشقلرین ان ائحتیراسلیسییلا قیاسلاییردیم. بوتون روحومو، گؤز یاشلاری ایچینده، آلوولو بیر هذیانلا، گؤزل‌لر گؤزلی ارمن قاردینین آیاق‌لارینین آلتینا سرهرک اونو پرستش ائلهدیییم آن، روحومو یوکسلدن او سئوینج حالینین یانیندا، وادی‌ده‌کی جوان قیزا قارشی حیس ائتدییم ائحتیراس نه ایدی کی؟ آه ارمن قاردی. ایشیق ساچان بیر ملک ایدی. بونو بیلدییمدن، گؤزوم باشقاسینی گؤرمهییردی. آه ارمن قاردی! ایلاهی بیر ملک ایدی. اونوتولماز گؤزلرینین درینلیکلرینه باخدیغیم زامان، ساده‌جه بونلاری و اونو دوشونودوم. ائولندیم. آندیمی پوزماغین لعنتینه اوغراماقدان قورخمادان ائولندیم و بو لعنته اوغرامادیم دا! بیر دفعه داها گئجهنین سسسیزلییینده ساده‌جه بیر دفعه داها، قفس شکلینده اولان پنجرهمدن ایچری، آرتیق منی ترک ائتمیش اولان او خفیف ایچ چکیشلری گیردی و چوخ یاخشی تانیدیغیم او شیرین سسه دؤنوشدو. آرامش ایچینده یات، نیه کی عشقین روحو، سولطان و حوکومداردیر. ائحتیراسلی قلبینه، ارمن قاردی آدلی قیزی آلدیغیندا ائلئنورایا وئردییین سؤزلردن معاف توتولدون. بونون سببینی ایسه آنجاق جنتده اؤیرنه بیلرسن.
درباره این سایت