ائلئنورا
یازار : ادگار آلن پو
چئویرمن: سئودا میرزازاده اصل - علیرضا سربازی بناب
چاپ: ایمضا درگیسی - دؤردونجو سایی
ائحتیراسلی و خیال قوّه‌سی گوجلو اولان بیر عاییلهدن گلیرم. اینسان‌لار، منه دلی دئییرلر. آمما، دلیلییین ان یوکسک ذکا اولوب اولمادیغی، درین و محتشم شئیلرین چوخونون دوشونجه خستهلیییندن، عمومی دوشونجه‌لرین یئرینی آلان، ذهنسل روح حال‌لاریندان قایناقلانیب قایناقلانمادیغی سورغوسو، هله ده تام اولاراق جاوابلانمامیش‌دیر. گوندوزلری خیال قورانلار، گئجهلری خیال قوران‌لارین الدن وئردیکلری بیر چوخ شئیدن خبرلی‌دیرلار. بوز خیال‌لاریندا، سونسوزلوغو گؤررلر و اویاندیقلاری آندا بؤیوک بیر سیررا یاناشماغین هیجانینی یاشارلار. او قیسا زاماندا، بیلگه‌لییین یاخشیلیغیندان بیر شئی لر اؤیرهنرلر؛ آمما، پیسلییین صاف بیلگیسیندن اؤیرندیکلری شئیلر داها چوخدور. سؤزجوکلره سیغمایان ایشیغین» گئنیش اقیانوسونا سینیرسیزجا، کیمسه اونلارا باشچیلیق ائتمهدن گیررلر و یئنیدن، ماجراچی نوبالی جغرافیاچی کیمی، قارانلیق دنیزی کشف ائتمهیه گئدرلر.
بئله اولسا، گلین منه دلی دئیین. ان آزیندان، ذهنسل وارلیغیمدا، ایکی آنلاشیقلی دوروم اولدوغونو قبوللانیرام؛ بیری، یاشامیمین ایلک دؤوروندهکی مناقشهسیز آیدین منطیقیم و اوبیریسی ده، بو آندا اولدوغوم دوروم و البته یاشامیمین بؤیوک بؤلومونه شامیل اولان قارانلیق و شوبههچی حالیم. بئلهجه، یاشامیمین ایلک دؤنمیله ایلگیلی آنلادیق‌لاریما اینانین و سونراکیلارا، ساده‌جه عاغلینیزا باتسا اینانین، یا دا هامیسیندان شوبههلنین، یا دا شوبههلنه بیلسهنیز، بونلاری، ادیپوسون تاپماجالاری کیمی گؤرون.
جوانلیغیمدا سئودییم قیزلا ایلگیلی اولان آنیلاریمی، ایندی، آیدینلیقلا خاطیرلاییرام و آرامشله یازا بیلیرم. او، چوخ زامان اؤنجه اؤلموش اولان آنامین، تک باجیسینین تک قیزییدی. خالاقیزیمین آدی، ائلئنورایدی. آل-الوان اوتلار وادیسینده، ایستی بیر گونشین آلتیندا بیرلیکده یاشایاردیق. بیریسی یول گؤسترمهینه قدر، او وادییه کیمسه گلمزدی. نییهکی، اوجا و بؤیوک تپهلرین آراسیندا یئرلشمیشدی. گونش ایشیغی، تپهلرین، شیرین اوج-بوجاغیندان بیزیم وادییه یول تاپاردی. بیر یاندان دا، تپهلر، هر شئیین و هر کسین یولونو، بیزه ساری کسمیشدی. یاخینلیق‌لاریندان، یول کئچمزدی. سئویملی یووامیزا یئتیشه بیلمک اوچون، مینلرجه مئشه آغاجینین آراسیندان، چتینلیکله کئچیب و میلیون‌لارجا خوش قوخولو گؤزل چیچهیی ازهرک اؤلومه گؤندرمهمیز گرکردی. بو نه‌دندن من، خالاقیزیم و آناسی یالقیز یاشاییردیق و وادینین اؤتهسیندهکی دونیادان هئچ بیر شئی بیلمهییردیک.
وادیمیزی سینیرلایان داغ‌لارین آردیندان، یاشادیغیمیز یئرین یوخاریسینداکی قارانلیق بؤلگهلردن سوزولهرک ائشییه چیخان ائنسیز و درین بیر چای وارییدی. ائلئنورانین گؤزلریندن سونرا، بو چایدان پارلاق بیرزاد یوخویدو. لابیرنت کیمی مسیرینده قیوریلاراق، ایکی داغ آراسینداکی قارانلیق درهدن و گئریده بوراخدیق‌لاریندان داها قارانلیق اولان تپهلرین آراسیندان کئچردی. بونا سسسیزلیک چایی دئیردیک. سانکی آخیشیندا، چئورهسینی آراملاشدیران بیر تاثیر وارییدی. یاواش-یاواش، سس چیخارتمادان آخاردی. چایین یاتاغیندا اولان و اونلارا باخماقدان دویا بیلمهدیییمیز اینجی چای داش‌لاری هئچ ترپشمزدیلر. هر بیری، اولدوغو یئرده قالیب احتشاملا داواملی پاریلداردیلار.
چایین قیراغیندا، موختلیف یئرلردن بؤیوک چایین یاتاغینا یاواشجا سوروشوب گلن گؤز قاماشدیریجی چای‌لار و لاپ دیبدهکی چای داش‌لارینا قدر اوزانان قایناق سیزینتی‌لارینین کئچدییی یئرلرده عینی داغ‌لار آراسیندا اوزانان او وادینین هر یئری کیمی یوموشاق، یاشیل، قالین، قیسا، دوز و وانیل قوخولو اوتلارلا دولویدو. اوت‌لارین آراسینا، سانکی ساری قایماق چیچکلری، آغ پاپاتیالار، مور بنؤوشهلر و یاقوت قیرمیزیسی زنبقلر سپیلمیشدی. اونلارین گؤرونتوسو، اورهییمیزده، تانری سئویگیسی و احتشامی اویاندیراجاق قدر گؤزلییدی.
هر یئرده، چمنلییین یاخینلیغینداکی بالاجا مئشه‌ده، ال دیمهمیش خیاللار کیمی، افسانهوی آغاج‌لار گؤیهرردی. بو آغاج‌لارین، اینجه و اوزون گؤودهلری، دیک بیر شکیلده یوکسلمزدی و گوناورتا چاغلاری، وادینین اورتاسینا دوشن گون ایشیغینا دوغرو ظریفلیکله اییلردیلر. اونلار، یاشام دولو، آبنوس و یا گوموش رنگلی گؤرکملی خال‌لارلا پارلایاردیلار و ائلئنورانین یاناق‌لاریندان سونرا، هر شئیدن داها هامارییدیلار. بو آغاج‌لارین، باش‌لاریندا ساچیلمیش کیمی گؤرونن و سحر یئلینده تیترهیهن بؤیوک و پارلاق یاپراق‌لارینی گؤرن بیر کیمسه، اونلاری، گونش تانریسینا سایغی گؤسترن بؤیوک سوریه ایلانینا بنزده بیلردی.
اورهییمیزه سئوگی دوشمهدن اؤنجه، بو وادیده، ائلئنورایلا اون بئش ایل ال-اله گزدیک. او اون بئش و من ده ییرمی یاشیندایدیق. بیر آخشام، ایلانا بنزهین آغاج‌لارین آلتیندا اوتوروب بیر-بیریمیزین قوجاغینا گیردیک و سسسیزلیک نهرینده یانسینان گؤرونتولریمیزه باخدیق. او شیرین گونون قالانیندا، هئچ بیر سؤز دانیشمادیق. او گونون صاباحی، سؤزلریمیز آز و تیترک ایدی. تانری ائروسو، دالغالاردان چیخاردیب گتیرمیشدیک و ایندی ایچیمیزده، آتالاریمیزین آلوولو روحلارینی اویاندیردیغینی حیس ائدیردیک. نسلیمیز، عصیرلردیر ائحتیراس‌لاری و خیاللاری ایله باشقاسیندان آیریلیردی؛ ایندی ایسه، ایچیمیزده اویانان ائحتیراس‌لار، هر جور خیاللار گؤرمهییمیزه ندن اولوردو. بونلار بیر آرایا گلدیی زامان، الوان اوتلار وادیسینده، آلوولو بیر سئوینج حالی، بیر نفس کیمی یاییلدی. هر شئی دییشیلمهیه باشلامیشدی. اسکیدن چیچکسیز اولان آغاج‌لاردا، ایندی اولدوز شکیلینده اولان، عجیب و پارلاق چیچکلر آچیلیردی. یاشیل فرشین رنگ تون‌لاری پارلاقلاشمیشدی. آغ پاپاتیالار، دانا-دانا سولدوقلاریندا، یئرلرینده، اونلارجا، یاقوت قیرمیزیسی زنبق گؤیهریردی. یول‌لاریمیزدان، یاشام قوخوسو گلیردی. ایلک دفعه گؤردویوموز فلامینگولار، باشقا شن قوشلارلا بیرگه بیزه آل رنگلی للکلرینی گؤستریردیلر. چایدا، آلتین و گوموش رنگلی بالیقلار اوزوردولر. چایین درینلیکلریندن گلن بیر میریلتی، گئتدیکجه یوکسهلیردی و سونوندا، ائلوسون چنگیندن چیخان سسدن داها ایلاهی و داها آرامش وئرن بیر ملودییه دؤنوشوردو. بو مئلودی، ائلئنورانین سسیندن باشقا، هر شئیدن داها گؤزلییدی. هئسپئرین دیاریندان، اوزون بیر مدت ایزلهدیییمیز بولود، بوردان یاواشجا سوزولوب چیخدی. قیپ-قیرمیزی و آلتین ساریسی رنگ‌لرینده، مؤحتشم اولان بو بؤیوک بولود، باشیمیزین اوستونه گلدییی زامان دوروب یاواشجا، گوندن-گونه آلچالماغا باشلادی. سونوندا، کنارلاری، داغ‌لارین زیروهلرینه دییب، او دونموش زیروهلره بیر احتشام قاتاراق، سانکی بیزی سونسوزا قدر هیبتلی، گؤرکملی و سئحیرلی بیر زیندانا قاپاتدی. ائلئنورانین گؤزللییی، اسرافیل ملکلرینین گؤزللییی کیمییدی. چیچکلرین آراسیندا کئچیردییی قیسا عؤمرو بویونجا، ساده و معصوم بیر باه قیزییدی. اورهیینی جانلاندیران سئوگی اودونو گیزلتمک اوچون حیلهلره اوز گتیرمه‌ییردی. بیرلیکده، الوان اوتلار وادیسینده یئریدییمیزده، منی، قلبینین ان درین یئرلریندن اینجهلهییب و بو اورکده، سون زاماندا اوز وئرن بؤیوک دییشیکلیکلری آنلاتیردی.
سونوندا بیر گون، گؤز یاش‌لاری ایچینده، منه، بوتون اینسان‌لارین باشینا گلهجک ان سون و ان حزین دییشیمدن دانیشدی. او گوندن سونرا دا، بو قونونو دیلیندن هئچ دوشورمهدی و بوتون دانیشیق‌لاریمیزین قونوسو اولدو. هر سؤزونده، تکرار-تکرار، عینی تصویری، شیرازلی ساز شاعیری کیمی چئشیتلی آنلاتمالارلا دئییردی.
اؤلوم بارماغینین، سینهسینه توخوندوغونو گؤرموشدو. قیسا زاماندا اؤلمک اوچون، بیر کپنک کیمی، سئوگییله سونلانمیشدی. آمما، اونو تک بیر شئی، قبیره گیرمکدن قورخودوردو. بو قونونو، منه بیر آخشام، آلا قارانلیق‌دا سسسیزلیک چایینین قیراغیندا آنلاتدی. اونو، الوان اوتلار وادیسینه گؤمدوکدن سونرا، بو سئوگی دولو یئردن سونسوزا قدر آیریلاجاغیمدان، اونا قارشی دویدوغوم ائحتیراسلی عشقی، گوندهلیک و وادیدن اوزاق دونیاداکی قیزلاردان بیرینه وئرهجهییمدن قورخوردوم. اورادا، اؤزومو بیردن-بیره، ائلئنورانین آیاق‌لارینین آلتینا آتدیم. و باشیمی قالخیزیب، اونا کیمسهیه ائولیلیکله باغلانمایاجاغیما، اونون دهیرلی خاطیرهلرینه هئچ واخت آلچاقلیق ائتمه‌یه‌جهییمه و منه قارشی صداقتله بسلهدییی او منی تقدیس ائدن عشقه اهانت ائتمه‌یه‌جهییمه اونا و تانرییا آند ایچدیم و دونیانین مؤحتشم حوکومداریندان، صداقت آندیمین شاهیدی اولماسینی ایسته‌دیم و تانریدان و سنت هلوژندن، بو آندیمی پوزدوغوم زامان، منی قورخونج بیر شکیلده لعنتلمهلرینی ایسته‌دیم؛ ائله بیر لعنتلهمک کی اوندان دانیشماغا جرأت ائتمه‌ییرم. بو سؤزلریمی ائشیتدییی زامان، ائلئنورانین پارلاق گؤزلری داها دا پارلادی. سانکی، بوینوندان بؤیوک بیر یوک ائنمیشدی. تیترهدی و حزین گؤز یاش‌لارینی تؤکدو. آمما، آندیمی قبول ائلهدی (سونوجدا، ساده‌جه بیر اوشاغییدی). بو قونو، اونون اؤلوم دؤشهیینده، راحاتلاماسینا سبب اولدو. بیر نئچه گون سونرا، آرامشده اؤلمک اوزره اولدوغو زامان، ایچینی راحاتلاتدیغیم اوچون، اؤلدوکدن سونرا، روحونون منی گؤزله‌یهجهیینی و ایذن وئریلیرسه گئجهنین بئواخت زامان‌لاریندا گؤره بیله‌جهییم شکیلده قاباغیما چیخاجاغینی سؤیلهدی. آمما، بو جنتدهکی روحلارین گوجوندن اؤته بیر ایش اولسا، ان آزیندان، منه تئز-تئز وارلیغییلا ایلگیلی اشارتلر وئره‌جهییدی. نفسینی، آخشام یئللرییله، اوزومه ووراجاغیدی، نفس چکدیییم هاوادا، ملکلرین بوخوردانلاریندان چیخان توستولرین خوش قوخوسونو یایاجاغیدی. بو سؤزلر آغزیندان چیخاندا، معصوم یاشامی سونا چاتدی و بئلهلیکله، منیم یاشامیمین دا، ایلک دؤنمی سونا چاتمیش اولدو.
بورایا قدر، هر شئیی اولدوغو کیمی دئدیم. آمما، زامانین یولونداکی، سئوگیلیمین اؤلومویله اورتایا چیخان او مانعی آشدیغیمدا، یاشامیمین ایکینجی دؤنمینه گیرینجه، ذهنیمه بیر کؤلگه دوشدو. اودور کی، آنلاتدیق‌لاریمین دوغرولوغوندان شوبهه‌یه دوشورم. آمما، گئنه ده داوام ائدیرم. ایل‌لر، آغیر-آغیر کئچدی. الوان اوتلار وادیسینده یاشاماغا داوام ائتدیم. آمما، هر شئی، ایکینجی بیر دییشیم کئچیردی. او اولدوز شکلیندهکی چیچکلر سولدو و بیر داها آچمادی. او یاشیل فرشین رنگی آتدی. یاقوت قیرمیزیسی رنگینده اولان زنبقلر قورودو و اونلارین یئرینده، گؤزه بنزهین تیره رنگلی بنؤوشهلر چیخدی. دوپ-دولویدولار، هر یئرلرینی شبنم توتموشدو. حضورسوزلوقلا، قوورولوردولار. و یاشام، او دیاری ترک ائتدی. آرتیق اوزون بویلو فلامینگولار، بیزه ساری یئلکلرینی سرگیلهمهییردیلر. یان‌لاریندا گتیردیکلری باشقا شن پارلاق قوش‌لاری دا آلیب وادینی قملی ترک ائدیب، تپهلره اوچدولار. آلتین و گوموش رنگلی بالیقلار، وادینین آشاغاسینداکی درهدن کئچیب، دؤنمهمک اوزره، اوزاقلاشدیلار و او سئویملی چایی، بیر داها سوسلمهدیلر. ائلوسون یئل-چنگیندن چیخانلاردان داها خوش و آرامش وئرن و ائلئنورانین سسیندن سونرا بوتون سسلردن داها ایلاهی اولان او ملودی، گئدهرک آزالدی و چای، ان سونوندا، اؤنجهکی سسسیزلییینه تکرار بوروندو. ان سونوندا دا، او بؤیوک بولود یوکسلدی، او قات قات قیزیل پیریلتیسینی و بوتون احتشامینی یانینا آلیب الوان اوتلار وادیسیندن چکیلدییی زامان، داغ‌لاری اسکی دونوقلوقلارینا ترک ائدیب هاسپارین دییارینا گئری دؤندو.
آمما، ائلئنورا، وئردییی سؤزلری، اونوتمامیشدی. چونکو، ملکلرین ساللانان بوخوردانلیقلارینین سسلرینی ائشیدیردیم. قوتسال بیر توستونون قوخوسو، وادییه یاییلیردی. گئجهنین بئواخت ساعات‌لارینداکی یالقیزلیغیمدا، قلبیم آغیرلیقلا آتاندا، آنلیمی اوخشایان یئللره خفیف آه سسلری قاریشیردی. گئجه هاواسیندا، خفیف میریلتیلار ائشیدیردیم. و بیر دفعهسینده، آه ساده‌جه بیر دفعه، اؤلو کیمی یوخلادیغیمدا، بیردن دوداق‌لاریمدا، دوداق‌لارینی حیس ائدهرک اویاندیم. آمما، قلبیمدهکی بوشلوق، بونلارلا دولماغی رد ائدیردی. داها اؤنجه اونو دولدوروب داشیرتمیش عشقی اؤزلهییردیم. سونوندا، وادی منه ائلئنورانی آنیمساتدیغی اوچون، بیر عذابا دؤنوشدو و اورانی، سونسوزا قدر، دونیانین قرورو و ظفرلری اوغرونا ترک ائتدیم. اؤزومو، عجیبه بیر شهرده تاپدیم. بلکه بوراسی، الوان اوتلار وادیسینده اوزون مدت گؤردویوم شیرین خیاللاری اونوتدورا بیلردی. گؤرکملی بیر سارایین دبدبهسی و ایلنجهلری، سلاح‌لارین قودوزجا شاققیلتیلاری و قادینلارین گؤز آلیجی گؤزللیکلری باشیمی دؤندوردو و منی سرخوش ائتدی. آمما، روحوم، هله ده وئردییی سؤزلره صادیق قالدیغی اوچون، گئجهنین سسسیز ساعات‌لاریندا، هله ده ائلئنورانین وارلیغینین اشارهلرینی آلا بیلیردیم. بو بلیرتیلر، بیردن کسیلدیکلری زامان، دونیام قارالدی. ذهنیمه دولان یاندیریجی دوشونجهلرله منه راحات وئرمهین قورخونج آرزولار قارشیسیندا، دهشتله دونوب قالدیم. چونکو، خدمتینده اولدوغوم شاهین ایلنجهلی سارایینا اوزاق‌لاردان، چوخ اوزاقداکی بیلینمهین بیر دییاردان بیر جوان قیز گلمیشدی و آلچاق اورهییم، بو قیزین گؤزللییینی گؤرجک تسلیم اولدو. اونا افتخارسیزجا بویون ایدیم. اونو عشقلرین ان ائحتیراسلیسییلا قیاسلاییردیم. بوتون روحومو، گؤز یاش‌لاری ایچینده، آلوولو بیر هذیانلا، گؤزل‌لر گؤزلی ارمن قاردینین آیاق‌لارینین آلتینا سرهرک اونو پرستش ائلهدیییم آن، روحومو یوکسلدن او سئوینج حالینین یانیندا، وادی‌ده‌کی جوان قیزا قارشی حیس ائتدییم ائحتیراس نه ایدی کی؟ آه ارمن قاردی. ایشیق ساچان بیر ملک ایدی. بونو بیلدییمدن، گؤزوم باشقاسینی گؤرمهییردی. آه ارمن قاردی! ایلاهی بیر ملک ایدی. اونوتولماز گؤزلرینین درینلیکلرینه باخدیغیم زامان، ساده‌جه بونلاری و اونو دوشونودوم. ائولندیم. آندیمی پوزماغین لعنتینه اوغراماقدان قورخمادان ائولندیم و بو لعنته اوغرامادیم دا! بیر دفعه داها گئجهنین سسسیزلییینده ساده‌جه بیر دفعه داها، قفس شکلینده اولان پنجرهمدن ایچری، آرتیق منی ترک ائتمیش اولان او خفیف ایچ چکیشلری گیردی و چوخ یاخشی تانیدیغیم او شیرین سسه دؤنوشدو. آرامش ایچینده یات، نیه کی عشقین روحو، سولطان و حوکومداردیر. ائحتیراسلی قلبینه، ارمن قاردی آدلی قیزی آلدیغیندا ائلئنورایا وئردییین سؤزلردن معاف توتولدون. بونون سببینی ایسه آنجاق جنتده اؤیرنه بیلرسن.
درباره این سایت